Programar – di da medias ils 02.04.2019 ella Scolaviva Laax
Scolaras e scolars dall’ emprema tochen la tiarza classa dil scalem superiur da Laax ein vegni introduci el mund da programar. Els han absolviu treis luvratoris cun Jürg Marguth, Peter Kreiliger e Laurent Sedano da Deltix/ novasmedias.ch:
- Programar 1: introducziun el lungatg da programar
- Programar 2: programar entras funcziuns e cirquits
- Programar 3: etica ella lavur da programar
L’instrucziun ha entschiet la damaun cun in beinvegni entras la menadra da scola Nesina Ackermann-Gartmann. Scolaras e scolars han silsuenter fatg ils emprems pass per scriver cul lungatg da programar Swift ed emprender las cumpetenzas d’informatica MI.2.2 (algoritems) tenor plan d’instrucziun 21.
Programar 1: introducziun el lungatg da programar
Programar endretg munta en emprema lingia da dar ils dretgs camonds. Scolaras e scolars fan differents exercezis cun camonds ed emprendan sco construir ina retscha da camonds.
Culla app „Swift Playground“ fan els exercezis che daventan adina pli complex. Els emprendan d’enconuscher la basa dil lungatg da programar „Swift“ ch’ei il lungatg da programar pils products dad Apple (i-phone, i-Pad, etc).
Programar 2: programar entras funcziuns e cirquits
Programar ei in lungatg da code cun segns specials ed ina atgna sintaxa. Scolaras e scolars s’approfundeschan el lungatg da code e fan in exercezi cull code da fontauna d’ina pagina d’internet. Els emprendan da scriver funcziuns e cirquits cul lungatg da programar „Swift“.
Sch’il code vegn screts falliu, enconuschan els la dretga metoda da „debugging“, dad anflar ora il sbagl el code.
Programar 3: etica ella lavur da programmar
Scolaras e scolars emprendan d’enconuscher il mund da lavur da programar. Tgei cumpetenzas drova ei per luvrar sco programadra e sco programmader? Daco ein ozildi mo 10% dils programaders dunnas? Cun programar san ins caschunar grond donn buc mo el mund digital, mobein era a persunas ed interpresas („hacking“). Mintgin che programescha, sto enconuscher las reglas specificas e surprender responsabladad.
